فيتــــــــــــو شـــــــــــــــــــو ( الخطوبـــــــــة)

عارف ال 3 العمى وكانوا عمرهم ماشافوا الفيل ودخلوا كل واحد يلمسة بايدة ويوصفة ...
واحد مسك جسمة قال دا زى العمارة .... والتانى مسك زلومتة وقال دا عبارة عن انبوبة كبيرة ...
والتالت مسك ديلة وقال دا عامل زى التعبان ....
اهى الخطوبة كدة ...
بتفاجىء بحاجة غريبة اوى لما تخطب ...
مهما حد وصفلك ومهما لمست الخطوبة بايدك عمرك ماحتتخيلها ....
وكل واحد خاطب بيحاول يوصفهالك بيفشل... ويقولك....
الحمد لله... ونعم بالله ... واحنا بايدينا اية ... وتوكل على الله لو عايز ...
واللى يجيبة ربنا كلة كويس ... ودا قدر ومكتوب ....
وربنا يهديك .... وتحس بعينة حتدمع ... وفى الاخر يطلع المصحف من جيبة
ويقعد يقرا ويدعيلك فى سرة متعرفش بيقول اية .....
جرب كدة تقول لواحد متجوز عايز اخطب .... يقولك ...
لية يابنى بس كدة انت لسة صغير والعمر قدامك ...
وسبحان الله هوا نفس الرد اللى بيقولهولك لما تقولة ... انا قررت انتحر ...
والخطوبة غير الارتباط ...
الخطوبة هو اول علاقة عقلانية بين رجل وامرأة
وبالتالى بتكون اول حوار عقلى بين الراجل والمرأة ... وتبدأ الصدمات بقا ...
ححكى النهاردة قصة شاب خطب ...
مرزوق شاب عاقل جدا ... خلوق جدا ... مجتهد ومكافح ... خلص كلية التجارة
اشتغل اكتر من شغل لحد مابقى موظف فى شركة كبيرة ....
وهيا... تهانى ...بنت جميلة رقيقة خلوقة وزميلتة فى الشركة ....
عينه عليها من زمان .... لحد ما اخد القرار ....واتقدملها ...
وفى حفل عائلى بهيج ....تمت الخطوبة ومن هنا تبدأ احداث قصتنا ...
اللى حيرويها علينا مرزوق نفسة ...
الخطوبة ..... يسلااااااااااااااااااااااااام .... فكرتونى
دى كانت بداية اختلافى مع تهانى واكتشافى لحقايق كبيرة اوى فى الحياة ...
الحياة ابتدت بالتفكير ... والتفكير بينمو ويتضح بالحوار ... والبداية بنا كانت بالحوار والكلام
نتكلم فى موضوع معين .... وبيكون الرأى فية متفق علية وبديهى جدا ...
بتفاجىء بان فى حاجات بديهية جدا مبيختلفش عليها اتنين ... بتختلف معاك فيها ...
مش بس بتختلف معاك دى بتشوف ان الرأى اللى بتتبناة فى منتهى الخطأ وانك ازاى تفكر كدة ...
الاول ... استغربت وسكت ..
وبعدين.... فووت وريحت دماغى وسكت ...
وبعدين.... حاولت افهمها واتناقش معاها ...
وهنا الغلطة ...
تهانى ياحبيبتى فى الموضوع دا المنطق بيقول كذا وكذا وكذا..... وتفاجىء بكلامك ...
مرزوق اية اللى انت بتقولة دا ... انا بتدمر كل اللى بنا ... انا مكنتش فكراك كدا ... انت اسف صح ؟
ياحبيبتى احنا بنتناقش وعلى العموم متزعليش روحك ربما نكون مختلفين فى الرأى ... بس غريبة..
والموضوع يبقوا اتنين ... وتلاتة ... ورابعة ... وكل ماتتعرف عليها اكتر كل ماالمواضيع تكتر ...
لحد ماتوصل للحقيقة ياريس .... انها واحدة تانية خاااااااااااااااااااااالص ...
عارف انا وصلت للسبب ...
هى اننا زى مثال الفيل ناس مشفتش قبل كدة وكل واحد بيشوف الموضوع
بدماغة وتفكيرة ....بختصار جدااااااااا هما نظرتهم فى الموضوع نظرة خاااااااااااااااااصة
عارف لو حرامى دخل بيتكم وسرق تحويشة عمرك والتليفزيون والكمبيوتر ودهبها ....
حتلاقيها متضايقة جدا .... ان الحرامى دخل بالجزمة وفيها طينة وداس على السجاد ....
هى دى النظرة الخاصة ...
وبدأ الموضوع دا يضايقنى ... مستلمتش دخلت حوار فى التانى فى التالت ....
وكل مرة كانت بتظهر عليا اعراض غريبة اوى ....
خفقان سريع فى القلب وضيق فى التنفس ... وارتفاع فى درجة الحرارة ...
فى الاول كان بيبقى فى وقت الحوار بس ...
وبعدين بقا لمجرد تفكيرى فى الحوار...
وبعدين لما بقا كلامها بتردد جوايا زى صدى الصوت ...
بقت الاعراض مبترحش نهاااااااااااااائى ...
ورحت للدكتور على فلافل الدكتور المشهور ...
وكان الراجل تشخيصة غريب .... قالى يابنى دى حاجة العلم بيعجز عن تفسيرها ...
السخونية اللى عندك دى لان طاسة نفوخك بتسيح ...وضربات قلبك بتضرب بسرعة
فظيعة لان جسمك بفرز ادرينالين بكميات كبيرة زى مايكون فى حيوان مفترس بيجرى وراك ...
انا شايف انك لازم تروح لطبيب نفسى ...
وانا حكتبلك على شوية ادوية تهدى ضربات قلبك .... وكمدات للسخونية ...
وبدا علاجى النفسى مع دكتور منصور شلاطة ....
(يستكمل فى الحلقة القادمة )

افكـــار فيتـــــو

بسم الله الرحمن الرحيم
عندى فى البيت دفتر خاص بيا ... مسمية صندوق الدنيا
دا عندى من زمان بكتب فية كل حاجة بتعجبنى وبحبها ....
قصص .. حكايات ..شخصيات..نكت...افكار ... مقولات ماثورة ..صور
اى حاجة بحس انها عجبتنى ....
وكل فترة بديها لحد بحبة يقراها ويعرف اللى بحبة ...
كأنى بدردش معاة وبحكيلة الحاجات اللى قريتها او عرفتها وعجبتنى ...
والنهاردة ححول صندوق الدنيا بتاعى لمدونة ....
علشان كل اللى بحبهم ...
واتمنى ان اللى بحبة انتم كمان تحبوة ...
ولما تقروة تحسوا اننا اصحاب وانى بدردش معاكم ...
فيــــــــــــــــــــــــــــــــــــــــــــــتو